Si more nu criaturo

Si more nu criaturo

di

Effeerre

Si more nu criaturo,'o Pataterno,
e' isso stesso ch'o porta 'n paraviso
'o da nu vaso e tanto s'accuntenta
quann'o criaturo l'ha fatto nu surriso

Dopp'o 'ccumpagna a casa d'a Maronna
addo' stanno criature 'e tutt'e razze
sape d'ognuno tutte quante 'e nomme
e a ognuno le lascia 'na carezza.

E tratta bbuono 'a chesti criaturelle
pe nun l'e fa' senti 'a malincunia,
s'e cresce cu surrise e caramelle
pe nun e fa' piglia' d'a nustalgia.

Ma l'atu juorno nun se sape comme
sparette nu criaturo all'improvviso
nun 'o truvajeno 'a casa d'a Maronna
e nun ce steva ncopp'o Paraviso

E ogne santo tremmava d'a paura
sapenno 'e da' nu dispiacere a Ddio
ma chillo cu chell'aria assaje sicura
dicette a tutti : -'O vaco a piglia' jo-

E cu santa pacienza 'o vicchiariello
scennette ncopp'a terra chella sera,
'a casa addò era nato 'o criaturiello
int'a nu vascio 'e parte d'e Quartiere

E cu na faccia nu poco emozionata
si avvicinaje anfino 'e 'npont'o lietto
addo' truvaje che steveno abbracciate
na mamma cu nu figlio astritto 'mpietto.